O servizo xurídico de Amigos da Terra leva máis de 10 anos traballando de xeito gratuíto a prol da defensa do medio ambiente mediante a ferramenta da legalidade. Outórgase asesoramento xurídico e faise a tramitación legal necesaria para acadar o cumprimento da normativa ambiental tanto pola cidadanía, como pola empresa privada e pola propia Administración.

Este servizo xurídico actúa a instancia de parte cando é un particular o que precisa deste asesoramento. Faino en todo o tocante á defensa do contorno natural entendendo este, non só como a fauna e a flora, senón tamén como o patrimonio galego e a propia saúde das persoas. E actuará de oficio cando sexa a propia organización a que leve a cabo todas as investigacións tendentes a clarificar a existencia dunha agresión ambiental.

A dificuldade da comprensión da linguaxe xurídica e as propias trabas burocráticas coas que se atopa o cidadán á hora de pór en coñecemento da Administración Pública e de Xustiza unha agresión ambiental, propiciou a necesidade de crear este servizo e facilitar, a través do mesmo, o acceso á equidade ambiental e aos instrumentos de defensa do medio ambiente para a poboación.

Amigos da Terra facilita non só un servizo gratuíto, senón tamén un Manual Xurídico de doado manexo e fácil comprensión para achegar a todos e todas as claves para acadar un medio ambiente sostible.

Joomla Templates and Joomla Extensions by ZooTemplate.Com