O sistema económico internacional está baseado no consumismo, e os propios gobernos están controlados polas multinacionais. O impacto da globalización fai moi difícil atallar a problemática ambiental, sobre todo no nivel local, deste xeito dende Amigos da Terra consideramos esta área de vital importancia.

Comercio xusto
Se aínda non coñeces esta iniciativa, aquí tes unha grande oportunidade para achegarte. O comercio xusto nace como unha alternativa ó comercio internacional, garantindo ós grupos de agricultores e artesáns de terceiros países un salario digno, a inexistencia de explotación infantil e da muller, respecto ó medio ambiente e establecemento de relacións a longo prazo con pagamentos por adiantado.

Ademais, as cooperativas de produtores invisten parte dos beneficios obtidos en educación, saúde e todo o que contribúa a mellorar a comunidade.

Que facemos nós? Nun principio tiñamos unha pequena tenda de produtos de Comercio Xusto no Centro Iris, pero nestes intres no que máis estamos a traballar é en proporcionar información ós cidadáns e mesmo realizamos obradoiros de educación para a paz no que se refire a esta temática.

Transxénicos
Sabes que é un Organismo Manipulado Xeneticamente?, coñeces os posibles riscos que poden existir neste tipo de produtos?, gustaríache saber se o que comes sufriu esta manipulación ou non?, queres saber que cadeas comerciais venden estes produtos?

O noso grupo de transxénicos podería axudarche a resolver as múltiples dúbidas que poidas ter e ademais ofréceche a oportunidade de esixir os teus dereitos como consumidor. O grupo de transxénicos tamén ten unha tarefa informativa.

O día mundial do consumidor do 2004 organizaron un vistoso evento na rúa onde se recolleron asinaturas para esixir a Bruxelas que especifique no etiquetado se os produtos son manipulados ou non.

Pasáronse cuestionarios ós peóns e resolveron as dúbidas que estes podían ter en relación con este tema. A creatividade ten lugar en todos os ámbitos. Se este tema é do teu interese anímate a participar.