Amigos da Terra finalizou con éxito a incorporación do sistema operativo de software libre GNU/Linux, na súa sede de Ourense e para todos os equipos da súa rede de traballo.

A filosofía do software libre establece que a xente poida usar o sotfware de todas as formas que considere socialmente útiles, de modo que está dispoñible para poder descargalo, modificalo e usalo do modo que máis lle conveña, unha filosofía que compartimos e apoiamos dende Amigos da Terra.

Ubuntu foi a distribución de GNU/Linux escollida por Amigos da Terra. O slogan de Ubuntu, "Linux para seres humanos", resume unha das súas metas principais, facer de Linux un sistema operativo máis accesible e doado de usar.

Ubuntu é un sistema operativo de código totalmente aberto, construído arredor do núcleo Linux. A comunidade de Ubuntu constrúese cos ideais descritos na Filosofía Ubuntu: que o software debe estar dispoñíbel gratuitamente, que as ferramentas de software deben ser usadas polas persoas no seu idioma local e a pesar de calquera dificultade, e que a xente debe ter a liberdade de personalizar e modificar o software de calquera forma que vexa necesario.

Podes atopar máis información sobre este software no sitio web de Ubuntu.