O 12 de xaneiro de 2010, produciuse un terremoto de magnitude 7,0 en Haití con varias réplicas fortes. Máis de 200.000 mil persoas morreron e un millón quedaron sen fogar. Amigos da Terra Haití (Haiti Survie) está a colaborar nos esforzos de axuda e necesitamos o teu apoio.

Amigos da Terra Haití desempeña un papel fundamental na sociedade haitiana, e máis amplamente na rexión do Caribe. Realiza un traballo moi valioso en soberanía alimentaria, deforestación e desertización, adaptación ao cambio climático e finanzas internacionais.

Axuda alimentaria

Amigos da Terra Haití proporcionou alimentos a máis de 700 familias cunha media de cinco persoas por familia. Os alimentos que están a ser distribuídos, que son producidos localmente dentro do posible, consisten en arroz, nichelas, aceite, sal, peixe seco e leite para os nenos.

Moitas familias están a vivir en campamentos ao aire libre onde viven baixo sabas con moi pouca protección do exterior. En cada campamento creáronse comités e os membros preparan os alimentos.

Distribución de auga

Durante as dúas últimas semanas o grupo distribuíu ao redor de 8.000 litros de auga potable en tres campamentos e ao redor de 20.000 litros de auga para responder ás necesidades de hixiene e domésticas.

Ademais, está prevista a instalación de tanques de auga potable nos campamentos que debería concretarse en dúas semanas.

Outro tipo de axuda

Amigos da Terra Haití distribuíu kits de hixiene ás familias nos campamentos e un total de 40 toldos para protexelos do clima. O terremoto deixou máis dun millón de persoas sen fogar e o aprovisionamento e distribución das carpas é unha prioridade antes da estación chuviosa en marzo.

O traballo de Amigos da Terra Haití

O grupo continúa fortalecendo o seu traballo principal. Isto inclúe, axuda para que os pequenos produtores se recompoñan nas zonas rurais danadas e aumenten a dispoñibilidade de alimentos producidos localmente no país.

Todos os esforzos de axuda de Amigos da Terra Haití son realizados en coordinación con socios para reducir custos e evitar duplicar as tarefas.

Fai unha doazón

Por favor, considera facer unha doazón hoxe para axudar a Amigos da Terra Haití na súa resposta de emerxencia á situación e os esforzos de reconstrución.