A asociación ecoloxista denunciará ante a Demarcación de Costas ao alcalde de Vigo, Abel Caballero, polo impacto ecolóxico e económico da súa pretensión de volver a cometer o erro de crear unha praia onde non existe.

Ante as recentes novas aparecidas nos medios de comunicación, nas que se informa que a Dirección Xeral de Costas ten previsto construír un novo espigón para mellorar o aspecto da praia de A Punta en Teis, tras o fracaso do aporte de area do pasado verán, a asociación ecoloxista alerta de que o problema volverá a repertirse unha e outra vez.

Amigos da Terra xa denunciou a situación da praia de Teis hai 10 anos, cando retiraron o muro da escola militar da ETEA, xa que era precisamente ese muro o que impedía que a area circulase e o que formou unha praia onde non existía.

Así mesmo, o pasado ano, cando o alcalde decidiu verter toneladas de area para mellorar o aspecto da praia, dende a asociación  tamén alertamos de que esa area non duraría demasiado, e acabaría colmatando o fondo da ría.

Agora, o Concello quere volver a cometer o mesmo erro, construíndo un novo muro e vertendo novamente toneladas de area, “un novo desacerto, xa que parte de esa area perderase de novo no fondo mariño, sepultando aínda máis os bancos marisqueiros, afirmou  Antón Lois, vogal de comunicación de Amigos da Terra.