Ante o novo intento do Concello de Trasmiras para converterse en base de avións-espía da OTAN, Amigos da Terra pide reflexión sobre as implicacións globais e os riscos para a poboación que leva implícita a instalación dunha base militar.

Son precisamente as bases de avións-espía un dous primeiros obxectivos a destruír en caso de conflito armado pola lóxica de eliminar as fontes de información inimigas.

Plantexar en Trasmiras unha base de avión Global Hawk leva implícito converter esa zona nun obxectivo preferente para un ataque en caso de conflito bélico.

Paralelamente situaría ao Concello de Trasmiras como entidade colaboradora da empresa Northrop Grumman que se sitúa na actualidade como a terceira contratista mundial na fabricación de armamento, sendo algúns dos seus "produtos estrela" ademais dos avións espía os submarinos nucleares e os bombardeiros portadores de armamento nuclear táctico. As persoas que desexamos un mundo en paz non consideramos agradábel a veciñanza con determinados lobbys empresariais.

Ás xustificacións clásicas sobre investimento e postose de traballo tampouco se xustificarían neste proxecto, pois trátase dunha instalación que incorpora tecnoloxía allea e dunha mera base operativa militar, sen apenas investimento en sectores locais, e os postos de traballo derivados do seu funcionamento son para persoal militar altamente especializado da propia OTAN sen apenas acceso á poboación civil salvo tarefas subsidiarias de servizos.

 En calquera caso Amigos da Terra considera que o beneficio económico non compensa o risco de situar a Ourense en xeral e Trasmiras en particular no mapa dos obxectivos militares preferentes.

Pola defensa da paz e ou futuro da terra, Amigos da Terra pide ao Concello de Trasmiras que reconsidere a súa proposta, e que se propoña como alternativa a instalación dunha base de avións  contraincendios.