| Plan de Xestión do Lobo en Galicia |
| Escrito por Webmaster |
| Venres, 27 Xuño 2008 01:00 |
        
Suponse aprobado para o vindeiro outono o Decreto que regule a xestión do lobo, co que se poría fin a unha carreira de fondo que tivo a súa orixe na necesidade de xestionar unha especie coma o lobo en Galicia, que alcanza a ser máis un animal asentado na cultura galega que unha alimaña.  Aínda co Plan é mellorable nalgúns aspectos, o mesmo presenta unha serie de puntos que son observados con optimismo, tanto polos precursores da defensa do animal, como por aqueles que sofren sobre o gando da súa propiedade os presuntos ataques de lobos. Esta inicial presunción responde aos problemas con que se atopa moitas veces a administración á hora da identificación dun cadáver comido polo lobo, xa que están proliferando os cans asilvestrados no rural e aumentando tamén, o número de aves carroñeiras na xeografía galega. O lobo deixa de ser unha especie cinexética e, con elo, desaparece a idea do lobo como “trofeo”. A administración vai adoptar, en base ao Plan, unha serie de medidas de control tratando de paliar os danos que o lobo produce sobre o gando.  E por outro lado, tratará de erradicar batidas ilegais, cepos, trampas e velenos que durante moitos anos foron a nota predominante nos montes galegos o que levou a pór a especie en grave risco de extinción. As batidas que se autoricen deberán estar debidamente xustificadas e so poderán levarse a cabo en base a un permiso da administración. A morte do lobo a mans de gandeiros e/ou cazadores, veríase coma un fracaso xa que resultarían, polo tanto, ineficaces as medidas de control promovidas pola Consellería. Neste senso, sería tamén de grande interese que ditas batidas foran feitas por técnicos da consellería, tal e como ocorre en Asturias, e non polos cazadores. Amigos a Terra celebra a posta en marcha da ultimación do Plan e con el, a regulación do Foro Galego do Lobo que se vai crear e que servirá para a xestión da especie por distintos organismos especializados que, xunto coa administración, farán pervivir o lobo como o gran protagonista de lendas na Galicia e como especie cun importante papel na biodiversidade dos montes galegos. |
Sindicación RSS
