Agricultores, ecoloxistas e consumidores esixen a Rosa Aguilar que a política española sobre transxénicos deixe de estar ditada polas multinacionais e que se prohiba o seu cultivo. Wikileaks demostra a alianza de determinados membros do Goberno de España con EEUU para favorecer á industria dos transxénicos e para premer a UE.

A raíz da información publicada a pasada fin de semana, baseada en datos de Wikileaks que evidencian unha estratexia conxunta a favor dos transxénicos dos gobernos de España e EEUU, Amigos de la Tierra en conxunto con outras organizacións de agricultores, ecoloxistas e consumidores, esixe que a política española sobre organismos modificados xeneticamente (OMG) deixe de estar controlada polas multinacionais e unha moratoria inmediata ao seu cultivo en España.

As organizacións esixen á ministra de Medio, Medio Rural e Mariño, Rosa Aguilar, que adopte as medidas oportunas, tome inmediatamente cartas no asunto esixindo responsabilidades aos que, escandalosamente, traballaron para favorecer os intereses das grandes multinacionais biotecnolóxicas en detrimento dos do conxunto da sociedade, da saúde pública e do medio.

Dende hai máis dunha década o Goberno de España defendeu practicamente en solitario o cultivo de transxénicos na UE, e é o único país que tolerou o seu cultivo a grande escala (segundo datos do propio ministerio, cultívanse entorno a 70.000 hectáreas dun millo modificado xeneticamente de Monsanto). E fíxoo sen cumprir coas normas europeas e españolas de transparencia, sen seguir os produtos a través da cadea alimentaria, sen obrigar a etiquetar os alimentos transxénicos e sen realizar seguimento ningún dos campos cultivados con estas perigosas sementes. Os datos feitos públicos agora explican por que se permitiu que campen ás súas anchas as multinacionais do sector, a pesar dos innumerables casos de contaminación xenética e os danos sociais e económicos que estes cultivos ocasionaron.

Por iso é de vital importancia que a nova ministra cambie inmediatamente a posición do Goberno de España e que a primeira medida sexa prohibir o cultivo de millo transxénico de Monsanto MON810 para a próxima campaña de sementeira, tal e como levan facendo dende hai anos os gobernos de ata dez países da UE (entre eles Francia, Austria ou Alemaña) debido ás evidencias científicas sobre os seus impactos no medio, a imposibilidade de convivencia da agricultura transxénica coa convencional e ecolóxica e as incertezas sobre os seus efectos sobre a saúde a longo prazo.

A prohibición do cultivo de transxénicos por parte do Executivo español é imprescindible para poder defender os intereses do noso medio, a nosa agricultura e a saúde pública, para que estes non sigan en mans da industria dos transxénicos, dos intereses de EEUU e dos que, dende as institucións españolas, os apoiaron abertamente, tal e como quedou demostrado nos cables de Wikileaks.

Non quedes parado ante a revelación de Wikileaks sobre os transxénicos!

Envía a túa carta á Ministra!