As denuncias foron interpostas ante a Consellería do Medio Rural e de Sanidade alertando da presenza de cinco balsas que acollen os purins que un veciño de Castro Caldelas transporta en camións ata un terreo que se presume da súa propiedade.

Os restos orgánicos son vertidos directamente polo veciño que os transporta en camións procedentes de granxas de animais ata unhas fincas das que se supón que é titular. As balsas carecen de xestión algunha ou impermeabilización que as faga aptas para este tipo de actividade, polo que os purins acábanse filtrando ao subsolo, danando os posibles acuíferos e outros descenden pola escorrentía ladeira abaixo, desmellorando a calidade do solo e danando a cuberta vexetal do terreo.

Fonte: denunciante. Balsas cos purins en Castro Caldelas. Marzo 2010

Non existe unha explotación agraria coma tal vinculada á actividade desenvolvida polo veciño, explotación que regula a lei de residuos. As balsas non están illadas nin existe drenaxe das mesmas, polo que se presume que é unha actividade non regulada nin autorizada e polo tanto, ilegal.

O veciño estaría incorrendo nunha infracción moi grave da lei que levaría aparellada unha sanción económica que podería elevarse aos 2 millóns de euros e a restitución do medio ambiente ao seu estado orixinario porque, aínda que este particular sexa o titular do terreo, ningún cidadán está lexitimado a facer actividades non autorizadas ou que poñan en risco e serio perigo o medio ambiente.

Debe terse en conta, así mesmo, a alta concentración de nitratos que conteñen os purins dos animais o que conleva á contaminación de augas e solos e tamén da atmosfera polas emisións ao aire que se producen ao ser balsas a ceo aberto.

Amigos da Terra queda á espera das resolucións administrativas que poidan arroxar información sobre a situación das balsas de Castro Caldelas e se corresponde, da imposición das correspondentes sancións.