O Valedor do Pobo presentou o Informe correspondente ao 2009 o pasado 15 de marzo. O Valedor é o alto comisionado do Parlamento galego para a defensa dos dereitos e liberdades constitucionais dos cidadáns. Con este fin, o Valedor do Pobo supervisará, de oficio ou a instancia de parte a través dunha queixa, a actividade da administración galega e dos seus entes e empresas públicas ou dependentes.

Amigos da Terra ao longo do ano 2009, se dirixiu a esta institución en temas relacionados coa imposibilidade da obtención de información ambiental previamente requirida ás administracións. Dun lado, a información ambiental que o concello de O Carballiño non facilitou en relación ás presuntas inspeccións realizadas nos últimos anos na canceira municipal, información que finalmente o concello transmitiu ao Valedor.

Doutro lado, dirixímonos tamén para solicitar a información correspondente ao emprazamento de cultivos experimentais de organismos modificados xeneticamente ou transxénicos, que as distintas Consellerías competentes non quixeron proporcionar. Neste senso, o propio Valedor tívose que dirixir ao seu homólogo estatal para que llas solicitara ao Ministerio de Medio Ambiente, aínda que entendemos que esta non é a única administración con competencias na materia.

En relación ao propio Informe e na área correspondente ao medio ambiente, o estudo do Valedor fai referencia case exclusivamente a problemas ocasionados pola contaminación acústica en relación ás zonas contaminadas pola concentración de ruído. Neste senso, o Valedor, de oficio, dirixe unhas recomendacións a certas administracións locais.

Igualmente, o Informe recolle a problemática que deriva da xestión das augas continentais no tocante a verteduras e depuradoras. Fai especial fincapé na EDAR de Vigo sobre a cal presentou unha queixa de oficio ante a negativa reiterada do concello de dar resposta, o que foi amonestado polo Valedor en vista a que dita negativa, podía constituir un delito do Código Penal.

En relación a este apartado fai ademais mención da transgresión que dende as administracións se fai do Convenio de Aarhus, xa que sinala que son comúns os atrasos á hora de responder ás solicitudes de información ambiental en poder da administración.

Se precisa saber como e cando presentar unha queixa ante o Valedor do Pobo, consulte www.valedordopobo.com