• Apenas o 16% dos residuos (exceptuando a fracción orgánica) van destinados á reciclaxe, e deles só o 10% é aproveitado (o resto é rexeitado), cando a fracción revalorizable (vidro, envases lixeiros, latas, papel, cartón) supera o 35% do lixo doméstico.
• No panorama da compostaxe, as cifras son aínda máis alarmantes: só ó 1,2% da fracción orgánica dos residuos municipais xerada anualmente en Galiza foi compostada.
• Ambos os dous puntos anteriores explícanse porque o 21% do lixo doméstico é rexeitado, o cal significa que a participación cidadá na recollida selectiva aínda é moi deficiente.
• Ao final do ciclo vital dos residuos, Galiza incinera o 58,4% do lixo doméstico e verte o 34%.
• As perspectivas de futuro máis inmediatas apuntan a que a incineración continuará sendo a aposta de SOGAMA e da administración.
• A concentración ou a centralización do tratamento de residuos significa un maior custe enerxético e un maior impacto ambiental, derivados ambos das propias instalacións e da recollida de lixo.

Á vista dos resultados, e como primeira conclusión, o Grupo considera que a xestión actual é claramente deficiente e insostible.

Os obxectivos e as metas xerais do Plan de Xestión de Residuos Urbanos de Galiza 2004-2010 pretenden claramente orientar a xestión de residuos urbanos cara a sostibilidade e a correcta xestión dos residuos urbanos: sensibilización da poboación, redución / prevención, recollida descentralizada, evitar o verquido, aumentar a taxa de reciclaxe e a calidade da recollida selectiva, aproveitamento da fracción orgánica mediante compostaxe ou biometanización, etc.

A planta de tratamento de Cerceda atópase actualmente nun estado de saturación operativa, recibindo 800.000 toneladas anuais, cando a súa capacidade máxima é de 500.000 toneladas. O Grupo considera que esta circunstancia debe representar unha oportunidade na política de xestión do lixo para apostar pola xestión anunciada no Plan de Xestión de Residuos Urbano de Galiza 2004-2010.

Ámbito de actuación do Grupo

O ámbito de actuación do Grupo será calquera cuestión ou aspecto que garde relación coa xestión dos residuos sólidos urbanos que se faga en territorio galego. Sen embargo, no que se refire ao ámbito de comunicación e difusión, o grupo poderá pronunciarse ou manifestar a súa opinión sobre calquera cuestión ou aspecto que garde relación coa xestión dos residuos sólidos urbanos que se faga en territorio galego ou español.

As actuacións do Grupo irán dirixidas á poboación en xeral e aos organismos administrativos responsables da xestión de residuos urbanos.

Alternativas. Áreas e metodoloxía de actuación do Grupo

Nos seguintes puntos se expoñen as principais áreas de actuación do grupo.

• REDUCIÓN: Dende o Grupo se defende o modelo das 3R (redución – reciclaxe – reutilización) como modelo a seguir na xestión do lixo. O Grupo cree que a prevención ou redución de residuos debe estar moito máis presente nas actuacións relacionadas coa xestión de residuos urbanos. A tarefa do Grupo neste campo será promover a minimización dos residuos urbanos xerados.
• COMPOSTAXE: O Grupo confía na compostaxe, preferentemente doméstica, como sistema de xestión de residuos que aproveita a materia orgánica -a cal representa o 52% do lixo doméstico- dun xeito eficiente, sostible e descentralizado. O Grupo confía na compostaxe doméstica como modelo non só implantable e viable en Galiza, senón tamén axeitado, dada a distribución poboacional de Galiza. A tarefa do Grupo neste campo será realizar proxectos de compostaxe, os cales deben incluír formación dos usuarios e supervisión durante o proxecto.
• SENSIBILIZACIÓN E PARTICIPACIÓN: O Grupo considera que os residuos son un ámbito que concerne a toda a poboación e que predomina unha deficiente concienciación ambiental na sociedade galega. Por isto se considera a sensibilización da poboación como unha ferramenta imprescindible para estimular a colaboración cidadán. A tarefa do Grupo neste campo será facer chegar aos cidadáns a problemática derivada dos residuos, os beneficios da minimización, da reciclaxe e da compostaxe de residuos, a existencia dos puntos limpos e outras instalacións, etc.
• MODELO ACTUAL DE XESTIÓN: Os obxectivos do Plan de Xestión de Residuos Urbanos de Galicia 2004-2010 son, en xeral, ben vistos polo Grupo de Residuos AdT, pero o Grupo considera que se trata duns obxectivos ambiciosos e que polo tanto requiren un gran esforzo por parte da Administración. A tarefa do Grupo neste campo será supervisar que os obxectivos do Plan se cumpran dun xeito satisfactorio dende o punto de vista social, económico e ecolóxico, e, no caso que ditos obxectivos non se cumpran, comunicarllo aos responsables competentes.

As accións coas que se mobilizará á cidadanía neste eido, son entre outras: charlas, obradoiros, comunicados de prensa, visitas a lugares de interese na temática dos residuos, formación (cursos, seminarios... etc)