Agora que as lapas van desaparecendo e a situación comeza a estar máis controlada; agora que acabou o risco máis visible e palpable, agora que? Agora comeza o problema grave.

Acabamos de devolver mais de 200 Toneladas de CO2 á atmosfera, CO2 que durante anos captaron todas esas árbores que arderon estes días, e que agora está voltando á atmosfera e contribuíndo ao agravamento do cambio climático.

rexeneración forestal tras os incendios

Agora que se apagou o lume, os solos están cubertos de cinzas nas que queda toda esa materia orgánica que acumulaban os montes. Cinzas que arrastradas por choivas torrenciais, van a parar a rios e rías onde constituirán un problema enorme contaminando cauces e bancos marisqueiros.

As perdas son de enormes dimensións e aínda que a máis visible é a masa forestal, que é a que ten o valor monetario, a perda ecolóxica é incalculable.

Fauna que comezaba a súa hibernación, que morreu dentro das madrigueiras, fungos e liques, especies que levaban centos de anos construíndo un ecosistema. Ecosistemas que deberían garantir a nosa supervivencia foron convertidos en cinza.

Hai que sinalar aos responsables: goberno e incendiarios

O goberno pola súa política de abandono do rural, de aposta polos monocultivos pirófitos, pola súa deixadez e mirada para outro lado.

Os incendiarios, porque aínda que o monte estea cheo de maleza, se non se lle prende lume non arde.

E agora que?

Dende Amigos da Terra, estes días estamos recibindo numerosas chamadas e ofrecementos de axuda; moitas persoas solidarizándose e querendo actuar.

Botar unha man ao montePero ollo, aínda que toda a axuda é importante, en primeiro lugar debemos de lembrar que as boas intencións non bastan e para evitar accións contraproducentes é imprescindible intervir de xeito coordinado e supervisado por persoas e/ou colectivos cualificados.

Publicamos un documento de emerxencia con pautas concretas de actuación en montes queimados que marca o que se debe facer e tan importante como iso, o que non se debe facer. Podes descargar o documento, actualizado a 19 de outubro de 2017, pinchando na imaxe.

Ademais disto, aconsellamos á cidadanía contactar cos seus concellos, comunidades de montes e axentes forestais da zona.

Accións de voluntariado

A nosa entidade esta a preparar intervencións xunto con outros colectivos para realizar actuacións de prevención da erosión en montes queimados e de rexeneración vexetal. Se queres participar anótate no seguinte formulario: Accións recuperación en zonas incendiadas