Amigos da Terra publica o informe A Compostaxe, unha aliada fronte a crise climática, no que demostra os beneficios do compost na adaptación e mitigación do cambio climático. O estudo enmárcase no proxecto “Aplicación de compost procedente de residuos municipais a chans agrícolas e pastos”, que conta co apoio do Ministerio para a Transición Ecolóxica a través da Fundación Biodiversidade.

• Grazas ao compost a materia orgánica incrementouse, chegando a cuadriplicarse nalgúns dos solos.

• A través da compostaxe poderíanse evitar máis de 1 millón de toneladas de GEI ao ano en España.

• Trátase da primeira investigación que agrupa a análise de composts e solos en territorios con características tan diferentes.

 

A investigación, realizada por Amigos da Terra e a Universidade de Santiago, revela a capacidade do compost para combater os procesos de desertificación, así como os millóns de toneladas de Gases de efecto invernadoiro ( GEI) que poderían evitarse co tratamento dos residuos orgánicos a través da compostaxe.

Na investigación analizouse o compost de 19 provedores diferentes, así como os 24 terreos nos que se aplicou a emenda orgánica, desde hortas ata viñedos ou prados. Trátase da primeira investigación que agrupa a análise de compost e a súa aplicación para coñecer a súa contribución na adaptación ao cambio climático en territorios con condicións e características tan diferentes, desde Aragón, Baleares, Cataluña, Galicia, A Rioxa ata Madrid.

O compost reduce os procesos de desertificación

Unha xestión incorrecta do uso da terra así como o cambio climático son factores que contribúen á desertificación e a perda de solo fértil . Os resultados demostran que o uso do compost reduce estes procesos de desertificación. A materia orgánica incrementouse en todos os chans dun 4% ao 8,6% de media, chegando a cuadriplicarse nalgúns casos. Estas porcentaxes tradúcense na mellora de fertilidade do chan e, por tanto, nun aumento da produción agrícola. O resto de valores analizados pasaron de media ao 5% de carbono orgánico e 0,35% de nitróxeno.

Á súa vez, o compost incrementou a estabilidade de agregados en todos os terreos, o que implica maior porosidad e permeabilidade cunha mellor aireación e fluxo de auga, e unha mellora na fixación de nutrientes. Na mesma liña, os chans contan agora cun PH equilibrado chegando a valores próximos á neutralidade.

A ONU denunciaba recentemente que no mundo pérdense cada ano 24.000 millóns de toneladas de solo fértil e máis dun cuarto das terras xa non poden utilizarse (2). Neste contexto, o compost é un da aliados clave. Ademais, España é unha das rexións máis afectadas polos procesos de desertificación, cun 70% do seu territorio afectado (3).

A compostaxe pode evitar a emisión de máis de 1 millón de toneladas de GEI

En 2016 as emisións xeradas polo tratamento e eliminación dos residuos en España supuxeron o 7% do total das emisións de gases de efecto invernadoiro, constituíndo a cuarta maior causa de emisión de gases de efecto invernadoiro en Europa. En total para o estudo aplicáronse 30,38 toneladas de compost, o que equivale a 91,14 toneladas de biorresiduos. Desta forma evitouse a emisión de entre 10,02 e 30,07 toneladas de gases de efecto invernadoiro. Ao ano xéranse en España 9,46 millóns de toneladas de biorresiduos, polo que se poderían evitar máis de 1,05 millóns de toneladas de GEI.

Amigos da Terra insta as administracións a apostar pola compostaxe como unha ferramenta decisiva para contribuír na loita contra a crise climática.

 

Notas:

Estudio “El Compostaje, un Aliado contra la Crisis Climática”: https://www.tierra.org/wp-content/uploads/2019/06/el_compostaje_un_aliado_contra_la_crisis_climatica1.pdf

  1. https://unfccc.int/es/news/degradacion-de-las-tierras-y-cambio-climatico-retos-interconectados-para-los-gobiernos
  2. https://news.un.org/es/story/2019/06/1457861
  3. https://www.efeverde.com/noticias/la-desertificacion-avanza-70-del-territorio-espanol-la-mala-planificacion/
  4. 10,02 ton de GEI evitadas se os residuos orgánicos foran a  vertedoiro e 30,07 ton de GEI evitadas se o seu destinofora a  incineración.