Durante setembro e outubro continuaremos co proxecto financiado na convocatoria Iniciativa Xove da Consellería de Política Social da Xunta de Galicia.

Levaranse a cabo accións participativas nunha temática que nos preocupa sobre maneira, o cambio climático. Gran parte do éxito das propostas de loita contra a emerxencia climática dependen de pequenas decisións individuais do día a día polo que é necesario formar, educar e sensibilizar empregando propostas innovadoras que facilite que chegue a mensaxe aos distintos colectivos da sociedade, sobre todo á xente máis nova. Sen prexuízo de que sigamos formándonos para mellorar as dinámicas de participación da asociación integrando a tan necesaria perspectiva de xénero.

Ata o de agora traballamos a temática do residuos, sobre todo os plásticos, a través da campaña on line “Xullo sen Plástico” onde as nosas activistas compartiron as súas estratexias no día a día para loitar contra o uso abusivo dos plásticos. Na mesma liña realizamos outra campaña para concienciar durante a actual alarma sanitaria do uso deste material como nas máscaras dun só uso, animando ao uso das reutilizables.

Nas vindeiras semanas temos programadas interesantes actividades para seguir sensibilizando sobre a emerxencia climática:

  • Exposición “Tecedoras do Cambio”. Do 15 de setembro ao 5 de outubro, Santiago de Compostela

Tecedoras do cambio” é unha exposición fotográfica que narra e retrata as historias de vida de mulleres valentes e loitadoras. Todas, referentes imprescindibles que lideran procesos de desenvolvemento das súas comunidades xunto a organizacións dos seus países e man a man con ONGD galegas. Amigos da Terra achega a historia da nicaragüense Yolidia Hernández que se atopará na librería Couceiro.

Máis información aquí>>

  • Alternativas contra a emerxencia climática. Venres 18 de setembro, Santiago de Compostela

No marco do programa Compostela + Solidaria, o 18 de setembro terá lugar unha Feira de alternativas contra a emerxencia climática. Será de 18:30 a 20.30 horas na praza Roxa de Compostela e estará dirixida a todos os públicos.

Con esta mostra a ONGD Amigos da Terra e a cooperativa de enerxía verde Nosa Enerxía, amosarán solucións sinxelas e prácticas para contribuír a frear a emerxencia climática. Máis información sobre a actividade aquí>>

  • A mobilidade a examen. Venres 18 de setembro, Santiago de Compostela

Co motivo da Semana Europea da Mobilidade e no marco do Compostela + Solidaria varios persoeiros farán un test para facer un percorrido en Santiago de Compostela e comparar a sostibilidade de diferentes medios de transporte (coche eléctrico compartido, bicicleta, patinete, bus urbano e camiañar a pé) avaliados en base o seu consumo enerxético, eficacia e eficiencia, calidade de vida e saúde, menos emisións de CO2 e aporte de maior aforro económico. Máis información sobre a actividade aquí>>

  • Conversa sobre como comunicar o Cambio Climático. Xoves 24 de setembro, online

Amigos da Terra participa na presentación de  O Libro do Clima publicado por Catro Ventos editora  e  que se realizará o xoves 24 de setembro ás 20h. por streaming. A presentación que organiza Verdegaia está vinculada ás actividades que, polo 25 de setembro, se realizan a nivel mundial para demandar accións globais contra o cambio climático. Desde Galiza, o Movemento Galego polo Clima, realiza accións baixo o lema Xustiza climática para sair de todas as crises! #XustizaClimática, que se realizarán entre o 21 de setembro e o 4 de outubro, á que nos sumamos desde Amigos da Terra dentro da Escola de Activistas de Iniciativa Xove.

Máis información sobre a actividade aquí>>

  • Día de Acción Global polo Clima. Venres 25 de setembro, toda Galicia

Xunto co Movemento Galego polo Clima as nosas activistas participarán noutra das accións globais polo clima que se levarán a cabo a nivel internacional para solicitar xustiza social e ambiental ante a actual situación de emerxencia climática. #TúQuéHaces25S

Manifesto Acción clima 25 S  e máis información sobre a actividade aquí>>

  • Acción forestal en Touron. Domingo 27 de setembro, Melón (Ourense)

Realizaremos accións de mantemento das plantacións de frondosas que realizamos nos últimos anos tras os incendios do 2017, unha mostra do que o cambio climático pode facer nos nosos montes. Máis información sobre a actividade aquí>>

  • Formación sobre Participación e órganos de decisión. Venres 2 de outubro (Ourense)

Co obxectivo de seguir traballando a introdución da perspectiva de xénero e a mellora dos procesos de participación na organización realizarase esta formación dirixida a traballar o xénero e os coidados nun dos catro espazos dos grupos: a toma de decisións. Así neste seminario aproveitaremos para continuar co proceso de reflexión sobre os nosos actuais órganos de toma de decisións entre asembleas: grupo de correo magma e xunta directiva. Máis información sobre a actividade aquí>>

  • Recuperación ecosistema dunar da praia América. 10 de outubro  (Nigrán)

Esta actividade consistirá na eliminación de plantas exóticas invasoras, mellora das condicións dunha planta ameazada, recollida de lixo e realización de actividades divulgativas e de sensibilización sobre o litoral.

Pola maña realizarase a actividade de voluntariado  (de 11 a 14:00 horas) e estarán guiadas por un educador ambiental de Amigos da Terra e complementaranse cun roteiro ambiental durante a tarde (16:00 horas) só para este voluntariado, coa finalidade de agradecer o seu traballo e aumentar a súa sensibilización na conservación do espazo.

Máis información sobre a actividade aquí>>

  • Como afecta o cambio Climático na natureza da nosa cidade?  Martes 13 de outubro (Ourense) ANULADO!!!

Na Aula da Natureza de Oira desenvolverase a cabo un taller práctico para aprender a recoñer as principais especies autóctonas de árbores e aves de Ourense e o impacto sobre as mesmas do cambio climático. Levarase a cabo un paseo pola beira do río Miño. Máis información sobre a actividade aquí>>

 

O proxecto tamén permitiu a tradución do Plan de Acción residuo cero, onde describimos que entendemos por residuo cero, a súa historia e como levalo a cabo na vosa realidade local. Estamos falando dunha guía con todos os elementos necesarios para preparar un plan de residuo cero.